सपत्नी, स्त्री, (समानः एकः पतिर्यस्याः । “नित्यं सपन्त्यादिषु ।” ४ । १ । ३५ । इति ङीप् । पत्युर्नकारादेशः समानस्य सभावोऽपि निपा- त्यते ।) समानपतिका । सतीन इति भाषा ॥ (यथा, आर्य्यासप्तशत्याम् । ४६३ । “या नीयते सपत्न्या प्रविश्य या वर्ज्जिता भुजङ्गेन । यमुनाया इव तस्याः सखि मलिनं जीवनं मन्ये ॥ यथा च । दौहित्राभावे सपत्नीपुत्त्रः । तस्य पुत्त्रत्वस्मरणात् । यथा मनुः । “सर्व्वासामेकपत्नीनामेका चेत् पुत्त्रिणी भवेत् । सर्व्वास्तास्तेन पुत्त्रेण प्राह पुत्त्रवतीर्म्मनुः ॥” एकपत्नीनामिति एकः पतिर्य्यासामिति । अत्र सपत्नीपुत्त्रस्य पुत्त्रत्वातिदेशात् तत्सत्त्वे- ऽपि स्त्रीणां सपिण्डनं मैथिलैरुक्तम् । तन्न । “पुत्त्रेणेव तु कर्त्तव्यं सपिण्डीकरणं स्त्रियाः । पुरुषस्य पुनस्त्वन्ये भ्रातृपुत्त्रादयोऽपि ये ॥” इति लघुहारीतवचने एवकारेणातिदिष्टपुत्त्र- निषेधात् । इति शुद्धितत्त्वम् ॥
📄 मूल मुद्रित पृष्ठ (5-255-b) स्रोत: राधाकान्तदेव, शब्दकल्पद्रुम (1822–1858). डिजिटल संस्करण: Cologne Digital Sanskrit Dictionaries — CC BY-NC-SA।